Argomenti de ricerca

A me linea de ricerca a core drìo al studio de a pianificassion umana, drento dee funsiòn esecutive. Oltre al proceso de pianificassion, me so interessà de varie robe, intorno a sti 3 fiòni: funsion cognitive, robe de metodoeogia, e esperiense de insegnamento.

Pianificassion visuo-spassiàe:

Go sviupà el test MAPS, che xe 'na version computerizà del "Problema de l'omo che va in giro pa vendare pa e case roba che nessuni voe" (TSP). Sto problema xe stà utiisà pa studiare a pianificassion visuo-spassiàe. A question xe stà considerà da vari punti de vista: a vaeutassion e riabiitassion neuropsicoeogica de zente co traumi frontài, i sostrati neurai dea creassion dee strategie, 'na simueassion co 'na rete artificiae de a seession percetiva dee euristiche, e doparando varie tecniche: a stimueassion magnetica transcranica (TMS) e a risonansa magnetica funsionàe. E robe pi interesanti che xe vegnue fora e xe che:
- a pianificassion no xe un processo che finisse co te te tachi movare, ma a va vanti anca fin che ti xe drìo metare in pratica el pian;
- pa vedare a pianificassion, i compiti visuo-spassiai basai sul TSP i xe mejo de altri tipo a Tore de Londra, e i poe vegner doparài pa studiare i problemi cognitivi dei mati e dei s-centrài;
- a pianificassion a vien fora da l'atività de un circuito fronto-parietae a vari livèi: i lobi parietai i parecia el primo pian, e quei frontai invesse i controea che'l vegna eseguìo justo, casomai i o cambia o i o sistema se xe necesario.

Memoria:

A memoria a xe uno dei procesi cognitivi pi importanti, e se poe studiarla da tanti e difarenti punti de vista. Tra quei che ghe xe, ghe ne go scelti 2 pa razon difarenti. El primo xe implicà co e funsiòn esecutive: cossa centra e cortece frontài co e memorie de laoro e prospetica (che sarìa a memoria pa e intenssiòn), studiae co a TMS; sto studio xe sta anca finansià dal ministero dea ricerca itaiana, sgancià al'unità de ricerca de Pavia, coordinà daea Prof. Paola Palladino. El secondo xe basà sul fato che me piaxe e cansòn: i psicoeogi che studia a musica i se insemenisse doparando materiae come musica clasica o 'na serie de note controeae (che de soito noe voe dir gnente). Però, sti materiai i xe completamente difarenti da quei che se sente de sòito co te impissi a radio. Quindi, me so messo studiar come che a zente se ricorda e informassion su cansoni pop, vedendo come che xe implicai difarenti procesi de memoria a lungo termine (in coeaborassion co Laura Pieroni PhD, Facoltà de Psicoeogia 1, de l'Università "A Sapiensa" de Roma).

Anaisi de dati de risonansa:

I me ga tirà in mezo aea creassion de un novo metodo de anaisi de dati de risonansa basà su l'Anaisi dee Componenti Indipendenti, e'l test de a Causaità de Granger. Sto metodo xe stà inventà da A. Londei e sviupà co A. D'Ausilio e'l grupo de ricerca de Roma. A roba bona de sto metodo novo a xe che no'l ga bisogno de tute chee informassion che de sòito xe necesarie pa fare el modèo, e te tira fora a reassiòn causàe che ghe xe tra regioni cerebrài: in sto modo el deventa un metodo che poe tirar fora circuiti funsionài. Fin desso el metodo xe stà usà su un compito fàssie in cui se scolta paròe sensa far gnente, e se ga visto el circuito fronto-parietàe che dei modèi recenti de percession de paròe gaveva ipotizà.

Altre robe:

Vista a me esperiensa in tea tecnica dea Stimoeassion Magnetica Transcranica, so drìo metarghe e man su varie ricerche in tanti campi cognitivi (che no centra un casso i uni co chealtri):
- el ruoeo dee aree motorie nel tempo de condussiòn interemisferica ('na coeaborassion tra a Prof. Bisiacchi e Prof. Vecchi, rispetivamente dei dipartimenti de psicoeogia de Padova e Pavia),
- el ruoeo dee aree parietài nel confronto de numari e nel calcoeo (co Elena Salillas PhD, co 'na coeaborassion tra i Proff. Semenza e Vecchi, rispetivamente dei dipartimenti de psicoeogia de Trieste e Pavia),
- a percession tàttie de movimento ('na coeaborassion col grupo comandà dal Prof. Pietrini, a Pisa, e co queo messo su dal Prof. Miniussi a Bressia).
- el ciruito fronto-parietae che dovarìa ocuparse dea navigassion into'n'anbiente 3D (co Chiara Saracini, che a fa el dotorato aea Sapiensa de Roma).

Borse

Borse personài:

Assegno de ricerca Post-Doc su "Un studio de stimoeassion magnetica transcranica rTMS de l'efeto Simon e de l'efeto SNARC", al Dipartimento de Psicoeogia Generae, Università de Padova (Febraro 2008).
Assegno de ricerca Post-Doc su "Metodoeogiè de ricerca de l'atività metaboico-funsionae de a cortecia cerebrae rispeto a l'elaborassion de stìmoi visuo-spassiài e tattii in sojeti umani", a l'Istituto de biochimica medica, Medical School, Università de Pisa, Italia (Lujo 2005-Jugno 2007).
Contrato pa un projeto de ricerca su a pianificassion umana (prot. 2005/541) al Dipartimento de Psicoeogia Generae, Università de Padova.
Borsa Socrates/Erasmus Europea pa l'Istituto de Psicoeogia Medica e Neurobioeogia Comportamentàe al'Università Eberhard Karls de Tübingen, Germania (Otobre 2002-Jugno 2003).
Corso de Ph.D. in Psicoeogia Cognitiva, XVII ciclo a ECONA, Facoltà de Psicoeogia 1, Università de Roma "La Sapienza", Italia (Novenbre 2001-Otobre 2004).
Contrato pa un projeto de ricerca su l'asesment neuropsicoeogico dee funsion esecutive (prot. 2001/677) al Dipartimento de Psicoeogia Generae, Università de Padova.
Borsa de studio annuae de l'ESU (Ente pal Dirito al Studio), Università de Padova, nei Ani Academici 1995-96, 1996-97, 1997-98, 1998-99.

Partecipassiòn a projeti de ricerca:

Finansiamento PRIN 2006 co a ricerca: "Ricordar intension: aspeti cognitivi, socio-motivassionai e neurocognitivi da 'na prospetiva life-span" coordinà daea Prof. A. Brandimonte.
Finansiamento PRIN 2005 co a ricerca: "Plasticità dei confini categoriai" coordinà dal Prof. W. Gerbino.
Finansiamento PRIN 2005 co a ricerca: "Disabiità de l'aprendimento: vaeutassion comportamentàe e cognitiva e riabiitassion" coordinà dal Prof. G. Lancioni.
Finansiamento PRIN 2003 co a ricerca: "Interpoeassion nea visiòn, nea assiòn, e nel spassio rapresentassionae" coordinà dal Prof. W. Gerbino.

Demis Basso

Ricerca